चैत २१ । आर्सनलले प्रिमियर लिगको उपाधि दाबेदारी कायम राखेको छ । इंग्लिस प्रिमियर लिग अन्तर्गत शनिबार राति भएको खेलमा वाट्फोर्डलाई ४–० ले हराएर आर्सनलले उपाधि सम्भावना कायम राखेको हो । चौंथो मिनेटमा नै एलेक्स सान्चेजले गोल गर्दै तेस्रो स्थानको आर्सनललाई सुरुवाती अग्रता दिलाए । ३८ औं मिनेटमा एलेक्स इओवीले गोल गरेपछि आर्सनलले पहिलो हाफमा २–० को अग्रता लियो । ४८ औं मिनेटमा हेक्टर बेलरिन तथा ९० औं मिनेटमा थियो वालकोटले गोल गरेपछि आर्सनल ४–० ले विजयी भयो । जितपछि ३१ खेलबाट ५८ अंक जोडेको आर्सनल दोस्रो स्थानको टोटनह्याम भन्दा चार तथा शीर्ष स्थानको लिसेस्टर सिटी भन्दा ८ अंकले पछि छ । टोटनह्यामको ३२ खेलबाट ६२ तथा लिसेस्टरको ३१ खेलबाट ६६ अंक छ । यस्तै शनिबार राति नै भएको अर्को खेलमा नर्विचले न्युक्यासललाई ३–२ ले हरायो । जितपछि ३२ खेलबाट ३१ अंक जोडेको नर्विच रेलिगेशन जोनबाट माथि १७ औं स्थानमा छ । ३१ खेलबाट २५ अंक मात्रै जोडेको न्युक्यासल १९औं अर्थात पुछारबाट दोस्रो स्थानमा छ ।

२१ चैत २०७२, आइतवार ०६:२८ बजे प्रकाशित