एजेन्सी, मंसिर १६ – म्यानचेस्टर सिटी लिग कप फुटबलको सेमिफाइनलमा प्रवेश गरेको छ । मंगलबार राति भएको खेलमा हल सिटीलाई ४–१ ले हराएर म्यानचेस्टर सिटीले लिग कपको सेमिफाइनलमा स्थान बनाएको हो ।

म्यानचेस्टर सिटीका लागि केभिन डी ब्राउनले दुई तथा विलफ्रेड बोनी र केलिची हिनोओचोले एक एक गोल गरे । बोनीले १२ औं मिनेटमा गोल गर्दै सिटीलाई सुरुवाती अग्रता दिलाए ।

पहिलो हाफमा १–० ले अघि रहेको म्यानचेस्टर सिटीका लागि ८० औं मिनेटमा हिनोओचोले गोल गर्दै अग्रता दोब्बर पारे । त्यसको दुई मिनेटपछि ब्राउनले गोल गरेपछि सिटीको अग्रता ३–० मा पुग्यो ।

८७ औं मिनेटमा ब्राउनले व्यक्तिगत दोस्रो गोल गरेपछि सिटी ४–० को अवस्थामा पुग्यो । ९० औं मिनेटमा हल सिटीका लागि एन्ड्रयु रोबटसनले एक गोल फर्काए । म्यानचेस्टर सिटीले पछिल्लो पटक सन् २०१४ मा लिग कपको उपाधि जितेको थियो ।

सन् २०१५ को उपाधि चेल्सीले जितेको थियो । बुधबार राति राति साउथह्यामप्टन र लिभरपुलबिचको खेलको विजेतासँग म्यानचेस्टर सिटीले सेमिफाइनलमा प्रतिस्पर्धा गर्नेछ ।

१६ मंसिर २०७२, बुधवार ०१:४३ बजे प्रकाशित