ओम प्रकाश यादव, बारा । रौतहटको छुट्ठा छुट्ठै स्थानमा भएको ट्याक्टर दुर्घटनामा ३ जनाको मृत्यु भएको छ । जिल्लाको भलोहीया वडा नं ३ मा ट्याक्टर दुर्घटना हुँदा दुई जनाको मृत्यु भएको छ । मृत्यु हुनेमा १९ वर्षीय दिलीप महतो र ३० वर्षीय देवेन्द्र तिवारी रहेका छन् । ना २ च ८४१२ नम्बरको उक्त ट्याक्टर आज विहान बाक्लो हुस्सुका कारण रोडबाट दस फिट तल खाल्डोमा झरेर दुर्घटनामा परेको प्रहरीले जनाएको छ । ट्याक्टरले च्यापिएर चालक सहित दुबैको घटनास्थलमै मृत्यु भएको थियो । त्यस्तै जिल्लाको मर्यादपुर वडा नं १ मा ना २ च ६६६६ नम्बरको अर्को ट्याक्टर दुर्घटना हुदाँ एक जनाको मृत्यु भएको छ । मृत्यु हुनेमा स्थानीय ३५ वर्षीय लालबाबु यादव छन् । दुईटै ट्याक्टर तिव्र गतिका कारण दुर्घटनामा परेको जनाईएको छ । तीनैजनाको शव पोस्टमार्टमका लागि जिल्ला अस्पताल गौरमा राखिएको छ भने घटनाबारे अनुसन्धान भइरहेको रौतहटका प्रहरी प्रवक्ता डीएसपी नबिनकृष्ण भण्डारीले जानकारी दिए ।

२६ पुस २०७३, मंगलवार १४:०२ बजे प्रकाशित