काठमाडौं, मंसिर २९ – नेपाली कांग्रेसले संविधान संशोधन र भूकम्प पछिको पुनर्निर्माण प्राधिकरण गठन सम्वन्धि विधेयक संसदमा एकैसाथ पेश गर्नुपर्ने अडान दोहोर्‍याएको छ ।

मंगलबार विहान बसेको कांग्रेस पदाधिकारी बैठकले दुबै विधेयकलाई सँगसँगै पेश गर्ने निर्णय गरेको बैठकपछि कांग्रेस महामन्त्री प्रकाशमान सिंहले जानकारी दिए ।

उनले भने, ‘दुबै विधेयकलाई एकसाथ पेश गरेर छुट्टा छुट्टै छलफल चलाएर र छुट्टा छुट्टै पास गर्नुपर्छ । यो हिजो प्रधानमन्त्री ज्यूले दिएको विकल्प मध्येको एक हो ।’

कांग्रेसले संविधान संशोधन र पुनर्निर्माण प्राधिकरण सम्वन्धि विधेयक संसदमा नल्याएको भन्दै संसद बैठक अबरुद्ध पार्दै आएको छ । व्यवस्थापिका संसद बैठक मंगलबार पनि बस्दैछ । मधेसी मोर्चाले भने संविधान संशोधन र पुनर्निर्माण अलग विषय भएकाले सँगसँगै पेश गर्न नहुने बताउँदै आएको छ ।

२९ मंसिर २०७२, मंगलवार ०५:४९ बजे प्रकाशित