तनहुँ, १ माघ । तनहुँको अरुणोदय–६ स्थित वक्सनमा ट्र्याक्टर दुर्घटना हुँदा चालक र सहचालकको घटनास्थलमा मृत्यु भएको छ ।

जिल्लाको दक्षिण भेगमा पर्ने किहुँबाट भीमादतर्फ आउँदै गरेको ग१त २४४९ नंको ट्र्याक्टर अनियन्त्रित भई कच्ची सडकदेखि करिब २० मिटर तल खस्दा सो दुर्घटना भएको हो ।

मृत्यु हुनेमा चालक स्याङ्जा जिल्ला चिलाउनेवास गाविस वडा नं ९ बस्ने २८ वर्षीय राजु भाट क्षेत्री र सहचालक उदयपुर जिल्ला चक्लाघाट नगरपालिका वडा नं १२ बस्ने १९ वर्षीय पुनम नेपाली रहेको जिल्ला प्रहरी कार्यालय तनहुँले जनाएको छ ।

घटना बिहीबार दिउँसो भए पनि दुर्घटना सदरमुकामदेखि टाढा भएका कारण समयमा समाचार प्राप्त गर्न नसकिएको जिप्रकाका प्रहरी नायब निरीक्षक नारायण पौडेलले जानकारी दिए ।

दुवै शव परीक्षणका लागि दमौली अस्पतालमा राखिएको र उनीहरुका आफन्तलाई जिम्मा लगाइने प्रहरीले जनाएको छ ।

१ माघ २०७२, शुक्रवार ०४:३५ बजे प्रकाशित