दाङ, १९ पुस । मोटरसाइकलको ठक्करबाट दाङको देउखुरीमा एकजना वृद्धको मृत्यु भएको छ ।

गढवा–३ परनाहवा निवासी ७७ वर्षीय वीरबहादुर खत्रीको ज्यान गएको जिल्ला प्रहरी प्रमुख कुवेर कडायतले जानकारी दिए ।

प्रहरीका अनुसार खत्रीको उपचारका क्रममा आज बिहान नेपालगन्जमा मृत्यु भएको हो । गढवा कालेकाँटे सडकखण्डअन्तर्गत परनाहवा भन्ने स्थानमा पैदल हिँडिरहेका खत्रीलाई शनिबार बेलुका रा१प ३५०७ नंको मोटरसाइकलले ठक्कर दिएर सख्त घाइते बनाएको थियो ।

घाइते खत्रीलाई लमहीको उपचारपछि राप्ती उपक्षेत्रीय अस्पताल घोराहीमा उपचारका लागि ल्याइएको थियो ।

तर राप्ती उपक्षेत्रीय अस्पतालले पनि अवस्था नाजुक रहेकाले नेपालगन्ज पठाएको थियो ।

१९ पुस २०७२, आइतवार ०५:१३ बजे प्रकाशित