गण्डकी प्रदेशमा पुरानै मन्त्रिमण्डलले निरन्तरता पाउने भएको छ । वैशाख २६ गते मुख्यमन्त्रीबाट राजीनामा दिएपछि पद खुस्केका मन्त्रीहरुले फेरि निरन्तरता पाउने भएका हुन् ।

उनीहरुको सपथ आजै २ बजेपछि प्रदेश प्रमुखको निवासमा हुने भएको छ । अविश्वास प्रस्तावमा मतदान हुने दिन अगावै २६ गते राजीनामा दिएका मुख्यमन्त्री पृथ्वीसुब्बा गुरुङ २९ गते पुन नियुक्त भएका थिए ।

गुरुङ सरकारमा आर्थिक मामिला तथा योजना मन्त्री किरण गुरुङ थिए । भौतिक पूर्वाधार तथा निर्माणमा रामशरण बस्नेत,उद्योग पर्यटन वन तथा वातावरणमा विकास लम्साल, सामाजिकमा नरदेवी पुन मगर थिए ।

माओवादीका हरिबहादुर चुमान र लेखबहादुर थापा बाहिरिएपछि आन्तरिक मामिला तथा कानुन र भूमि व्यवस्था कृषि तथा सहकारी मन्त्रालय खाली छन् ।

सरकार अप्ठेरोमा परेपछि मुख्यमन्त्रीले विवादित छवीका राजीव गुरुङ (दीपक मनाङे) लाई युवा तथा खेलकुद मन्त्री बनाएका थिए । सपथ खाएको १० दिन पछि उनको पद खुस्केको थियो । सामाजिक मन्त्रालय फोरेर उनलाई मन्त्री बनाइएको हो ।

बहुमतीय सरकार निर्माणका लागि प्रदेश प्रमुखले गरेको आह्वान अनुसार दलहरु सक्षम नभएपछि गुरुङले पुन निरन्तरता पाएका हुन् । कांग्रेससहित ३ दलले बहुमतीय सरकारका लागि दाबी पेस गरे पनि उनीहरुले हस्ताक्षर भने बुझाउन सकेका थिएनन् ।

मुख्यमन्त्रीले आइसोलेसनमै रहेका बेला सपथ खाए पनि मन्त्रीमण्डल विस्तार गर्न भने सकेका थिएनन् । आज उनले मन्त्रिमण्डल विस्तार गर्ने र पुरानै मन्त्रीलाई दोहोर्‍याउने मुख्यमन्त्री निकट स्रोतले जनाएको छ ।

असार १ मा बजेट ल्याउनु अगावै मुख्यमन्त्रीले विश्वासको मत लिनुपर्ने छ । यसका लागि केही मन्त्रालय खाली राखेर साना दललाई फकाउने अनुमान गरिएको थियो । तर अनुमानभन्दा पर पुगेर उनले पुरानैलाई निरन्तरता दिएका छन् ।

बजेट ल्याउने बेला भएको र पहिला काम गरेका मन्त्रीले नै सबै कुरा बुझेको भएकाले उनीहरुलाई नै ल्याउन लागेका बताइएको छ ।

१ महिनाभित्रमा मुख्यमन्त्रीले विश्वासको मत लिन नसकेमा अर्को सरकार बनाउने अन्तिम प्रयास हुने छ । त्यो सरकारले पनि विश्वासको मत लिन नसकेमा प्रदेश मध्यावधि निर्वाचनमा जाने निश्चित छ ।

३ सांसद भएको राष्ट्रिय जनमोर्चाले केन्द्र र प्रदेशमा ओली सरकार र उनका समर्थकलाई समर्थन नदिने बताएसँगै गण्डकीमा गुरुङ सरकार धरापमा परेको थियो । जनमोर्चाका ३ सांसदमध्ये २ सांसदले ढुलमुले नीति दिएका कारण न त गुरुङ सरकारले बहुमत ल्याउन सक्यो न त विपक्षी गठवन्धनको सत्ता मोह पूरा भयो ।

५ जेठ २०७८, बुधवार ११:०३ बजे प्रकाशित