१४ साउन, काठमाडौं । बैंकिङ कसूर मुद्दाका फरार अभियुक्त पक्राउ परेका छन्। मनोहरा नगरपालिका २ का ४६ वर्षीय राम खड्कालाई प्रहरीको केन्द्रीय अनुसन्धान ब्युरोको टोलीले बुधबार पक्राउ गरेको हो।

उनलाई हात्तीगौंडाबाट पक्राउ गरेको ब्युरोका प्रवक्ता प्रहरी उपरीक्षक श्यामकुमार महतोले जानकारी दिए।

यसअघि २०७८ साल वैशाख १४ गते उच्च अदालत पाटनले खड्कालाई बैंकिङ कसूरजन्य अपराध गरेको ठहर गर्दै ९ दिन कैद र ९ लाख रुपैयाँ जरिवाना तोकेको थियो। त्यसपछि उनी फरार भएका थिए।

उनले आफ्नो खातामा पर्याप्त मौज्दात रकम नभएको थाहा हुँदाहुँदै झुक्याएर एनआइसी एसिया बैंकको चेक दिएको अनुसन्धानबाट खुलेको थियो।

अदालतले उनलाई बैंकिङ कसूर तथा सजाय एेन २०६४ अनुसार सजाए तोकेको थियो। अब उनले ९ दिन कैद र ९ लाख रुपैयाँ जरिवाना तिर्नुपर्नेछ।

१४ साउन २०७८, बिहीवार १७:२० बजे प्रकाशित