काठमाडौं, ६ चैत । बेलायती राजकुमार हेनरी चाल्र्स अल्वर्ट डेभिड ह्यारी काठमाडौं आइपुगेका छन् । कतार एयरवेजको जहाजमार्फत उनी शनिबार दिउँसो २ बजेर ३८ मिनेटमा काठमाडौंमा अवतरण गरेका हुन् । उनीसँगै टोलीमा बेलायती विदेश राज्यमन्त्री ह्युगो स्वायर तथा बेलायती सञ्चारमाध्यमका पत्रकार गरी ३० जनाभन्दा बढी छन ।  ह्यारीले शनिबार अपराह्न ५ बजे प्रधानमन्त्री केपी शर्मा ओलीसँग शिष्टाचार भेटवार्ता गर्ने कार्यक्रम छ । त्यस्तै उनले आइतबार बिहान ११ बजे राष्ट्रपति विद्यादेवी भण्डारीसँग भेट्ने कार्यक्रम छ ।  ५ दिने भ्रमणका क्रममा ह्यारीले भूकम्पबाट क्षतिग्रस्त पाटन दरबार स्क्वायरका मन्दिर र भवनहरूको पुनर्निर्माणबारे जानकारी लिनेछन् । ह्यारी भक्तपुर पुगेर बेलायती सहयोग नियोग डिएफआइडीको सहयोगमा निर्मित नेपाल रेडक्रसको आपत्कालीन उद्धार तथा आपूर्ति स्थलको अवलोकन गर्नेछन् । ह्यारी पोखरा पनि जाने र टे«किङमा सहभागी हुने जनाएको छ ।

६ चैत २०७२, शनिवार ०९:४४ बजे प्रकाशित