इलाम, २९ माघ । मेचीराजमार्गअन्तर्गत इलामको बरबोटेमा गएराति भएको मोटरसाइकल दुर्घटनामा परी नेपाली काँग्रेस इलामका क्षेत्रीय सदस्य महेश कार्कीको ज्यान गएको छ ।
पाँचथरबाट इलामतर्फ आउने क्रममा मे७प ५०९ नंको मोटरसाइकल बरबोटे–५ मा दुर्घटनामा परी इलाम नगरपालिका–५ का ३७ वर्षीय कार्कीको ज्यान गएको जिल्ला प्रहरी कार्यालय इलामले जनाएको छ । दुर्घटनामा परी गम्भीर घाइते भएका कार्कीलाई उपचारका लागि जिल्ला अस्पताल ल्याउँदै गर्दा बाटोमै ज्यान गएको प्रहरीले जनाएको छ ।
कार्की हालै सम्पन्न भएको नेकाको जिल्ला अधिवेशनमा इलाम क्षेत्र नं ३ बाट क्षेत्रीय सदस्यमा निर्वाचित भएका थिए । रासस
