इलाम, २५ माघ । जिल्ला स्वास्थ्य कार्यालय इलामले नौ महिनादेखि पाँच वर्षसम्मका २६ हजार ११८ जना बालबालिकालाई दादुरा–रुबेला रोगविरुद्ध खोप दिने भएको छ ।

जिल्ला खोप समन्वय समितिको हालै बसेको बैठकले दुई चरणमा खोप दिन लागिएको जनाएको छ ।

खोप सुपरभाइजर राजकुमार पोखरेलका अनुसार पहिलो चरण फागुन ९ देखि १४ गतेसम्म जिल्लाका दुई नगरपालिकासहित २३ गाविसमा र दोस्रो चरणअन्तर्गत फागुन १६ देखि २० गतेसम्म एक नगरपालिकासहित २० वटा गाविसमा खोप सेवा सञ्चालन गर्न लागिएको हो ।

खोप अभियानका लागि स्वास्थ्य कार्यालयले ४६९ वटा खोपकेन्द्रमा दुई सय दक्ष स्वास्थ्यकर्मी, ९३७ जना महिला स्वास्थ्य स्वयम्सेविका परिचालन गरिने जिल्ला स्वास्थ्य कार्यालयले जनाएको छ ।

जिल्लाका लक्षित बालबालिकालाई खोप सेवाबाट वञ्चित नहुन् भन्ने उद्देश्यले जिल्ला स्वास्थ्य कार्यालयले कर्मचारी परिचालनको तयारी गरेको जनाएको छ ।

यस्तै सोही अवधिमा जन्मेदेखि पाँच वर्षसम्मका ३१ हजार ४१४ बालबालिकालाई पोलियो खोप लगाइनेसमेत खोप सुपरभाइजर पोखरेलले बताए ।

२५ माघ २०७२, सोमवार ०३:३४ बजे प्रकाशित