गोरखा । भूकम्पले घर भत्केपछि नागरिकता, लालपूर्जालगायत महत्वपूर्ण काजगात पुरिएकाले सेवाग्राहीको सुविधालाई ध्यान दिँदै गोरखाको तीनवटा निर्वाचन क्षेत्रमा घुम्ती शिविर सञ्चालन गरिने भएको छ । आउँदो जेठ १४ गते सिम्जुङ गाविसको बालुवा बजारमा, १७ गते थुमी गाविसको आर्खेतमा र २१ गते घैरुङ गाविसको बतासेमा घुम्ती शिविर आयोजना गर्ने निर्णय भएको स्थानीय विकास अधिकारी नारायण आचार्यले जानकारी दिए । शिविरमा जिल्ला प्रशासन कार्यालय, जिल्ला मालपोत कार्यालय, नापी कार्यालय, जिल्ला पशु विकास कार्यालय, जिल्ला कृषि विकास कार्यालय, जिल्ला प्रहरी कार्यालय, महिला तथा बालबालिका कार्यालयलगायतका कार्यालयका कर्मचारी उपस्थित भई सेवाग्राहीको काम गर्ने आचार्यले बताए ।  तीनवटै ठाउँमा दुई दिनका दरले घुम्ती शिविर सञ्चालन हुन्छ । भूकम्पले घर भत्केपछि महत्वपूर्ण कागजात पनि पुरिएको थियो । राहत एवम् पुनःनिर्माणको काममा नागरिकता र लालपूर्जा अनिवार्य भएपछि सेवाग्राहीलाई गाउँमै पुगेर सेवा दिन लागिएको प्रमुख जिल्ला अधिकारी नारायणप्रसाद भट्टले बताए ।

९ जेठ २०७३, आइतवार १४:२० बजे प्रकाशित