संस्थागत रुपमा कुनै निर्णय नगरी उपभोक्तालाई बढी मूल्यमा पेट्रोल बेच्ने अनुमति दिनु गैरकानुनी र भ्रष्टाचार भएको भन्दै उनीहरुले उक्त निर्णय तत्काल नसच्याए आफूहरुले प्रतिवाद गर्ने चेतावनीसमेत दिएका छन् ।

वाइसिएल र क्रान्तिकारीले बजारमा भारतको अघोषित नाकाबन्दीको निहुँमा सिर्जना गरिएको कृत्रिम अभावका कारण उपभोक्ता मारमा परिरहेका बेला दिनदहाडै देश र जनताविरुद्ध भएको त्यसखालको निर्णय नसच्याए आफूहरु चुप लागेर नबस्ने वाइसिएल र क्रान्तिकारीको विज्ञप्तिमा उल्लेख गरिएको छ ।

वाइसिएलका अध्यक्ष रामचन्द्र शर्मा र क्रान्तिकारीका अध्यक्ष रमेश मल्लले आज जारी गर्नुभएको विज्ञप्तिमा कालोबजारी नियन्त्रण गर्न, अनियमितता र कालोबजारीमा संलग्न व्यक्ति, उक्त निर्णयमा सहभागीलाई कारबाही गर्न, ग्यास, पेट्रोल र डिजल तथा मट्टीतेललगायतका पेट्रोलियम पदार्थको सहज आपूर्ति गर्न ध्यानाकर्षण गराइएको छ ।

निगमले केही दिन पहिले विराट पेट्रोलियमलाई पेट्रोल बेच्ने अनुमति दिएको थियो । निगमले बजारमा उपलब्ध गराउँदै आएको पेट्रोलभन्दा विराटको पेट्रोल महँगो रहेको छ । रासस