स्वास्थ्य तथा जनसंख्या मन्त्री भानुभक्त ढकालले अहिले देखिएको कोरोना संक्रमणको वृद्धिदर अझै बढ्दै गए काठमाडौं उपत्यकामा कुनैपनि बेला भयावह हुन सक्ने बताएका छन् ।

मन्त्री ढकालले यस्तो स्थिति आउन सक्ने भएकाले सबैमा सचेत रहन आग्रह पनि गरेका छन् । उनले भने, काठमाडौं उपत्यकामा संक्रमण फैलिएमा सरकार नयाँ रणनीतिअनुसार नियन्त्रणको तयारीमा छ ।’

त्यसको लागि उनले बाहिरी जिल्लाबाट उपत्यका भित्रिने व्यक्तिलाई क्वारेन्टाइनमा राख्ने, जोर बिजोर प्रणालीबाट सवारी साधन सञ्चालन गर्न दिने र पीसीआर टेस्टको दायरालाई बढाएर जाने लगायतका विषयलाई अगाडि बढाइने उनले बताए ।

दैनिक १८ हजार पीसीआर परीक्षण गर्न सक्ने क्षमतामा सरकारसँग रहेको मन्त्री ढकालको दावी रहेको छ । सरकारले परिस्थितिलाई हेर्दै परीक्षणको दायरा बढाउने र त्यसको तयारी स्वरुप दैनिक १८ हजार परीक्षण गर्न सक्ने क्षमताको विकास गरेको मन्त्री ढकालले बताए । मन्त्री ढकालले सरकारले दैनिक १८ हजार जनासम्मको परीक्षण गर्न आवश्यक सबै सामग्रीलाई तयारी अवस्थामा रोखेको बताए ।

परीक्षण नगरेको कारणले अथवा परीक्षण कम गरेको कारणले रिपोर्ट कम भयो भन्ने आरोपको खण्डन गर्दै उनले भने, यो मेरो दावी होइन । तर हामीले जे क्राइटेरिया बनाएका छौं अहिलेसम्म त्यसका आधारमा हामीले गरेका छौं ।’

१८ साउन २०७७, आइतवार २२:१६ बजे प्रकाशित