गुलरिया (बर्दिया), २५ फागुन । तीन पटक प्रधानमन्त्री बनिसकेका काँग्रेसका वरिष्ठ नेता, सर्वसाधारणका छोरा शेरबहादुर देउवा नेपाली काँग्रेस जस्तो गरिमामय पार्टीको केन्द्रीय सभापति पदमा निर्वाचित हुनुभएकोमा प्रेस क्लब अफ नेपालका अध्यक्ष यम घिमिरेले हार्दिक बधाई ज्ञापन गर्नुभएको छ ।

अध्यक्ष घिमिरेले आज एक बक्तव्य प्रकाशित गरी उहाँको नेतृत्वको नेपाली काँग्रसले नेपालको लोकतन्त्र दिगो बनाई संविधान संशोधन एवम् नेपालको विकासको विशेष योजनामार्फत नेपाललाई सामाजिक, आर्थिक, राजनीतिक, कूटनीतिक रुपले सक्षम, सवल र समुन्नत राष्ट्रमा परिणत गर्ने विश्वास लिएको बताउनुभएको छ ।

मोफसलका पत्रकार र नेपाली सञ्चारमाध्यमको संस्थागत विकासमा उहाँबाट अत्यन्त महत्वपूर्ण नीतिगत निर्णय गराउन, बजेट तथा कार्यक्रम सरकारी तवरबाट विनियोजन गराउनसमेत विशेष भूमिका प्रदर्शन होस् भनी अपेक्षा रहेको पनि उहाँले उल्लेख गर्नुभएको छ ।

उहाँलाई विजयी गराउन सहयोग गर्नुहुने सम्पूर्ण काँग्रेसजनलाई पनि अध्यक्ष घिमिरेले हार्दिक धन्यवाद ज्ञापन गर्नुभएको छ । रासस